ZORAM TODAY| Aizawl 3rd June, 2024 (Mon): Tunhnai khan Trinity Hospital electric transformer dahna hnuai kawngko laih vanga leimin buaipui a nih laia Cyclone Remal rawn ken, ruah baw-hawk sur avangin hospital electric supply a khaihlak hlauhthawn thu-ah ICU damlo pahnih Ebenezer Hospital-ah sawn phei an ni a, hei hi Hospital building min tur anga social media ah thehdarh niin pawi an tih thu Hospital thuneitute'n an sawi.

" Hospital building chu engmah hlauh-thawnawmin a awm lo. Generator nen electric supply pawh pangngai takin maintained leh nghal a ni. Hei hi social media lamah hospital building hlauhawm anga tihdarh a hriat a ni a, damlo tam takin rawn pan ngam loh phah nan an lo hmang tih kan hriatin pawi kan ti hle a ni," an ti.

" Hospital building leh a chhunga thawktute leh damlo te tana hlauh turin engmah hlauhthawn tur a awm lo tih kan han puang a ni e. Mamawhtu tam takte tana harsatna siamsak thei thu dik lo thehdarh hmain thil awmdan dik tak enfiah hmasak ni thei thin se a duhawm hle,"  tiin Dr K.Lalbiakzuala, Medical Director, Trinity Hospital chuan thuchhuah siamin a tarlang.